கல்வி தரத்தை உயர்த்தும் புதிய விதிகள்

கோலாலம்பூர், செப். 21 – கல்வி அமைச்சகம் மலாய் மொழி (BM) கற்பிக்கும் அனைத்து ஆசிரியர்களும், இனி மலாய் மொழி புலமைத் தேர்வு (Ujian Penguasaan Bahasa Melayu Guru – UPBMG) எழுத வேண்டும் என அறிவித்துள்ளது.

சுற்றறிக்கையின் படி, மலாய் மொழி நிபுணர் அல்லாத ஆசிரியர்கள் குறைந்தபட்சமாக படி நிலை 4 (Level 4) பெற வேண்டும். இது சிக்கலான உரைகளிலிருந்து கருத்துகளைச் சுருக்கி, உரிய மொழிநடை மற்றும் சொல்லாடலுடன் வெளிப்படுத்தும் திறனை மதிப்பீடு செய்கிறது.. நிபுணர் ஆசிரியர்கள் படி நிலை (Level 5 ) அடைய வேண்டும். இது, பல்வேறு ஆதாரங்களிலிருந்து தகவல்களை விமர்சன ரீதியில் மதிப்பீடு செய்து, பாடத்திட்ட உருவாக்கம், தேர்வுக் கேள்வி அமைத்தல், பாடப்புத்தக மதிப்பாய்வு போன்ற பொறுப்புகளை ஏற்கும் தகுதியை உறுதிப்படுத்துகிறது.

முக்கிய அம்சங்கள்

• முதல் முயற்சிக்கான தேர்வு கட்டணத்தை அரசு ஏற்கும். ஆனால் தோல்வியடைந்தால் மறுதேர்வு செலவை ஆசிரியர் தாமே ஏற்க வேண்டும்.
• Level 5 பெற்ற நிபுணர் ஆசிரியர்கள், பாடத்திட்ட வடிவமைப்பாளர், மதிப்பீட்டாளர், பாடப்புத்தக விமர்சகர் ஆகிய பணிகளில் முன்னுரிமை பெறுவார்கள்.
• காரணமின்றி தேர்வில் பங்கேற்காமல் தவிர்த்தால், 1993ஆம் ஆண்டின் பொது சேவை ஒழுக்க விதிகளின்படி ஒழுங்கு நடவடிக்கை எடுக்கப்படும்.

கல்விக் கொள்கை விளக்கம்

கல்வி அமைச்சகத்தின் கூற்றுப்படி, இந்தத் தேர்வு ஆசிரியர்களின் திறனை மதிப்பீடு செய்வதோடு மட்டுமல்லாமல், தேசிய மொழியாகிய மலாய் மொழியின் தரத்தையும் நிலைநிறுத்தும் முயற்சி ஆகும்.

ஆனால், மூத்த ஆசிரியர்களுக்கு அழுத்தம், மறுதேர்வு செலவினால் ஏற்படும் நிதிசுமை, நகர்ப்புற–ஊரக இடைவெளி போன்ற சவால்கள் கவனிக்கப்பட வேண்டியவையாக உள்ளன.

👉 ஜடாயு குரலின் பார்வையில், மலாய் மொழி புலமைத் தேர்வு, ஆசிரியர் திறன் – மாணவர் தரம் – தேசிய மொழிக் கொள்கை ஆகிய மூன்றையும் ஒருங்கிணைக்கும் கல்வித் தர உயர்வின் அடித்தளம் ஆகும்.