எப்போதும் கொண்டாடப்பட வேண்டிய கங்கை அமரன்!

✍️ ஜடாயூ கலையுலகம், செப்டம்பர், 22
தமிழ் திரையுலகில் பன்முகத் திறமையால் தனக்கென அடையாளம் பதித்தவர் கங்கை அமரன். பாடலாசிரியர், இசையமைப்பாளர், இயக்குநர், பாடகர், பின்னணி குரல், கதாசிரியர் என சினிமாவின் ஒவ்வொரு துறையிலும் தடம் பதித்து ரசிகர்களின் மனதில் இடம்பிடித்தவர்.

1977 ஆம் ஆண்டு 16 வயதினிலே படத்தில் எழுதிய “செந்தூரப்பூவே…” பாடல் இவரின் ஆரம்பம். பின்னர் “பூவரசம் பூ பூத்தாச்சி”, “புத்தம் புது காலை”, “என் இனிய பொன் நிலாவே”, “வெத்தல வெத்தல”, “சரோஜா சாமா நிக்காலோ” என தலைமுறைகளை கடந்து செல்லும் நூற்றுக்கணக்கான பாடல்களை எழுதியுள்ளார்.

இசையில் சாதனை

1979ல் வெளியான ஒரு விடுகதை ஒரு தொடர்கதை படத்தின் மூலம் இசையமைப்பாளராக அறிமுகமானார். “எங்க ஊரு ராசாத்தி”, “அள்ளி அள்ளி வீசுதம்மா” உள்ளிட்ட அசத்தலான ஹிட் பாடல்களை தந்தார். சுவரில்லாத சித்திரங்கள், வாழ்வே மாயம், நம்ம ஊரு நல்ல ஊரு போன்ற படங்களின் பாடல்கள் இன்று கூட ரசிகர்களின் பிளேலிஸ்டில் இடம் பெறுகின்றன. சுமார் 70க்கும் மேற்பட்ட படங்களுக்கு இசையமைத்துள்ளார்.

இயக்கத்தில் வெற்றி

1982ல் வெளியான கோழி கூவுது படம் இவரின் இயக்குநர் வாழ்க்கையின் முதல் படைப்பு. கரகாட்டக்காரன் படத்தின் மூலம் வரலாறு படைத்தார். ராமராஜனுடன் எங்க ஊரு பாட்டுக்காரன், வில்லுப் பாட்டுக்காரன் போன்ற பல ஹிட் படங்களை இயக்கினார். மொத்தம் 20க்கும் மேற்பட்ட படங்களை இயக்கி ரசிகர்களை கவர்ந்தார்.

பிற பங்களிப்புகள்

பாக்யராஜின் ஆரம்பகால படங்களுக்கு குரல் கொடுத்ததோடு, பாடகராகவும் பல நினைவில் நிற்கும் பாடல்களை வழங்கியுள்ளார். சினிமாவில் தன் மகன்கள் வெங்கட் பிரபு, பிரேம்ஜி ஆகியோரின் வெற்றியும் இவரின் வாரிசு கலைப்பயணத்தின் தொடர்ச்சிதான்.