லண்டன், செப்.21 –
பிரிட்டன் பிரதமர் கெயர் ஸ்டார்மர் தலைமையிலான அரசு, பாலஸ்தீனத்தை ஒரு தனி சுயாட்சி நாடாக முறையாக அங்கீகரித்துள்ளது. 1967 எல்லைகளின் அடிப்படையில் பாலஸ்தீனாவின் அரசுரிமையை ஏற்றுக்கொள்வதாகவும், ஆனால் இறுதி எல்லைகள் எதிர்கால பேச்சுவார்த்தைகளில் தீர்மானிக்கப்படும் என்றும் ஸ்டார்மர் தெரிவித்துள்ளார்.

இந்த அங்கீகாரம் ஹமாஸுக்கான பரிசாக அல்ல என்பதை பிரதமர் வலியுறுத்தினார். எதிர்கால பாலஸ்தீன அரசில் ஹமாஸ் எந்த வகையிலும் பங்கு பெறக்கூடாது என்றும், ஹமாஸ் தலைவர்களுக்கு எதிராக கூடுதல் தடை நடவடிக்கைகள் எடுக்கப்படும் என்றும் அவர் குறிப்பிட்டார்.

பிரிட்டன், ஆஸ்திரேலியா மற்றும் கனடா ஒரே நாளில் இத்தகைய அங்கீகாரத்தை வெளியிட்டுள்ளன. இதன்மூலம் பாலஸ்தீனத்தை அங்கீகரிக்கும் உலக நாடுகளின் எண்ணிக்கை 150-ஐத் தாண்டியுள்ளது.

பாலஸ்தீன தலைவர்கள் இதை வரவேற்று, சர்வதேச அரங்கில் இது முக்கிய முன்னேற்றம் எனக் கூறினர். ஆனால், இஸ்ரேல் பிரதமர் பெஞ்சமின் நெதன்யாகு கடுமையாக எதிர்த்து, “இது பயங்கரவாதத்திற்கு வெகுமதி அளிப்பதற்கு சமம்” என விமர்சித்தார்.

இச்செய்தி உலகளவில் பெரும் எதிரொலியை ஏற்படுத்தி வருகிறது. மேற்கு ஆசிய அமைதி முயற்சிகள் மீண்டும் உயிர்பெறுமா என்ற கேள்விக்குறி எழுந்துள்ள நிலையில், பிரிட்டனின் இந்த நடவடிக்கை சர்வதேச அரசியலில் புதிய பரிமாணத்தை உருவாக்கியுள்ளது.